Tre vjet pas largimit nga skena politike, ish-ministri i drejtësisë Eduard Halimi kthehet në Partinë demokratike. Në datën 3 mars kryetari i Partisë Demokratike Lulzim Basha e ka emëruar Eduard Halimin në postin e koordinatorit të posaçëm politik për zgjedhjet e 25 prillit. Halimi do të ketë në fokus të punës së tij të gjithë problematiken e fushatës elektorale dhe procesit zgjedhor. Nuk dihet kush e bindi Halimin më shumë se Basha që bëri ftesën dhe mbi të gjitha se çfarë e bindi. Emrat nuk janë publikuar, por nuk do ishte çudi që pas kësaj ftese të ishte edhe si emër në listat e Tiranës, apo një qarku tjetër. Eduard Halimi u zgjodh deputet në Berat në zgjedhjet e vitit 2017, por pak muaj më vonë në shkurtin e 2018 ai dorëzoi mandatin duke deklaruar tërheqjen nga jeta politike. Eduart Halimi vendosi të lërë mandatin e deputetit, të tërhiqet nga politika aktive për të ndjekur pasionin e tij, avokatinë. Në atë kjohë madje u tha se Halimi do të zhvendosej me punë në Strasburg ku do të punonte në një zyrë juridike, me më shumë të ardhura seç përfitonte si deputet. Në zgjedhjet parlamentare të 2017, Halimi ishte zgjedhur si deputet në qarkun e Beratit, i vetmi deputet në radhët e opozitës në këtë zonë. Sipas listës shumëemërore të kandidatëve për deputetë, i dyti në listë në këtë qark ishte Astrit Veliaj.