Koronavirusi i ka marrë jetën edhe ish-deputetit, ambasadorit dhe ministrit Marko Bello. Ai nuk mundi ta fitojë betejën me virusin e rrezikshëm, duke iu ndërprerë jeta në moshën 59-vjeçare. Ai ishte dërguar për mjekim në Turqi pas gjendjes së tij të rënduar, por nuk mundi të mposhte virusin që ka pushtuar botën. Marko Bello, lindi më 12 shtator të vitit 1961 dhe ka qenë deputet i Partisë Socialiste në Kuvendin e Shqipërisë deri ne vitin 2013. Lajmin e dha ish-kryetari i Kuvendit, Namik Dokle, i cili shkruan në Facebook se ky është një lajm i trishtë dhe i pabesueshëm. Në status Dokle shkruan se lajmi që mori në mesnatë ishte i pabesueshëm dhe i trishtë. Në periudhën 1997-2000, Marko Bello ka shërbyer si ambasador i Shqipërisë në Rumani dhe më pas zv/ministër i Mbrojtjes. Marko Bello ishte dhe një nga anëtarët themelues të Këshillit të Ambasadorëve Shqiptarë. Për ndarjen e parakohshme nga jeta të Marko Bellos ka reaguar edhe presidenti Ilir Meta, i cili shprehet se diplomati dhe pedagogu la pas një dhimbje të madhe, duke shtuar se ai ishte bashkëpunëtori, kolegu, intelektuali dhe qytetari model.