Ish-ministri i Mbrojtjes, Shigeru Ishiba do të jetë kryeministër i ri i Japonisë, pasi fitoi një garë të ngushtë për të udhëhequr Partinë në pushtet Liberal Demokrate. Ishiba, 67 vjeç, mposhti kandidaten nacionaliste Sanae Takaichi në balotazh, në një garë e cila ishte ndër më të paparashikueshmet për liderin e partisë në dekadat e fundit. Plot nëntë kandidatë garuan për këtë post. Lideri i liberaldemokratëve, partisë që ka udhëhequr Japoninë pothuajse përgjatë gjithë epokës së pas luftës, e ka praktikisht të sigurt emërimin kryeministër i vendit për shkak se partia e tij ka shumicën në Parlament. Kryeministri në largim, Fumio Kishida, njoftoi në gusht se do të jepte dorëheqjen për shkak të një varg skandalesh, të cilat zbehën popullaritetin e partisë. “Ne duhet t’i besojmë popullit, duhet ta themi të vërtetën me guxim dhe sinqeritet, dhe të punojmë së bashku për ta bërë Japoninë vend të sigurt, ku të gjithë mund të jetojnë të lumtur përsëri”, tha Ishiba gjatë një fjalimi të shkurtër para ligjvënësve pas votimit. Qëndrimi e tij ndaj diplomacisë me aleatin më të madh të Japonisë, SHBA-në, do të jetë në qendër të vëmendjes, duke qenë se ai vazhdimisht ka kërkuar që marrëdhëniet mes tyre të jenë më të baraspeshuara.