Korrupsioni, një plagë e hapur e vendit tonë si pasojë e drejtësisë së munguar, falë ngritjes së Prokurorisë speciale dhe organeve të tjera, duket se gradualisht po gjen ndëshkueshmëri. Janë dhjetëra zyrtarë të arrestuar, të marrë të pandehur, të cilët nga poste të larta drejtuese të shtetit, sot ndodhen prapa hekurave. Saimir Tahiri, i cili ka mbajtur postin e ministrit të brendshëm, që prej 4 shkurtit u dërgua nga salla e gjyqit drejt qelive të paraburgimit, ku do të vuajë një dënim prej 3.4 vitesh burg për lidhjet me vëllezërit Habilaj dhe përfitimet e padrejta të marra prej tyre. Lefter Koka, ish ministër mjedisi, ndodhet në burg që prej dhjetorit të vitit të kaluar dhe akuzohet për disa vepra penale në lidhje me procedurën e kontratës së koncesionit për ndërtimin e impiantit të trajtimit të mbetjeve urbane dhe prodhimit të energjisë në Qarkun e Elbasanit.