Dy ekspertët mjekoligjorë të cilët u kërkuan radhën e kaluar nga Gjykata e Posaçme për të kryer ekspertimin mjekësor të ish gjyqtares Pajtime Fetahu, u paraqitën ketë të hënë në seancë. Ata morën detyrat nga togat e zeza dhe bënë betimin në lidhje me aktin që do të kryejnë në ambientet e paraburgimit në Pogradec për të përcaktuar gjendjen shëndetësore të ish gjyqtares. Mbrojtja ligjore e Fetahut ka pretenduar se ajo ka probleme të rënda shëndetësore dhe se qëndrimi në qeli i rrezikon jeten, por ky pretendim do përcaktohet nga ekspertët. Ekspertët pritet të sjellin konkluzionin e raportit të ekspertimit, javën e ardhshme kur do mbahet seanca e radhës. Fetahu mbahet në qelinë e paraburgimit që prej muajit nëntor të vitit 2024, në kuadër të një urdhër arresti që u leshua nga SPAK mbi hetimet për Suel Çelën dhe anëtarët e grupit të tij. Ish-gjyqtarja e Elbasanit Pajtime Fetahu akuzohet nga SPAK se i shërbente Suel Çelës, përmes uljes së dënimeve për anëtarët e grupit të tij, por edhe përmes ndërhyrjes te kolegët e saj për të zbutur masat e sigurisë, apo ulur dënimet ndaj tyre. Kjo është masa e dytë e sigurisë për ish gjyqtaren. Të parën ajo e ka arrest shtëpie për përfshirjen në dosjen e grupit të Franc dhe Hajda Çopjas, po në Elbasan.