Qendrat e votimit për zgjedhjet e Parlamentit Evropian u hapën të premten në Republikën Çeke dhe në Irlandë, në ditën e dytë të këtij procesi. Përgjatë katër ditëve, sa zgjasin këto zgjedhje, do të mund të votojnë 360 milionë shtetas të 27 vendeve anëtare të bllokut evropian. Në Irlandë, partia opozitare, Sinn Fein synon t’i shfrytëzojë këto zgjedhje për të rritur mbështetjen para zgjedhjeve kombëtare që pritet të mbahen në vitin e ardhshëm. Irlanda i ka 14 vende të rezervuara në Parlamentin Evropian. Publiku në këtë vend është i shqetësuar për rritjen e numrit të azilkërkuesve, prandaj edhe është rritur numri i kandidatëve të pavarur që kanë dalë me premtimet për politika më të ashpra të imigrimit. Në Republikën Çeke, zgjedhjet do të mbahen të premten dhe të shtunën. Ky shtet ka 21 vende të rezervuara në Parlamentin Evropian. Partia opozitare ANO, pritet t’iu afrohet shifrave të partive që janë aktualisht në pushtet, sipas agjencisë çeke të sondazheve, STEM. Duke qenë se janë zgjedhjet e para pas pandemisë së koronavirusit, nisjes së luftës së Rusisë në Ukrainë, valës së imigrantëve, dhe rritjes së rreziqeve prej ndryshimeve klimatike, ato konsiderohen tejet të rëndësishme për të ardhmen e Parlamentit Evropian. Kjo, gjithashtu, është hera e parë që mbahen zgjedhje të tilla pa Britaninë e Madhe, e cila është larguar zyrtarisht prej BE-së më 2020. Holanda ishte vendi i parë që nisi votimet të enjten, ndërsa të shtunën, procesi fillon edhe në Itali, Letoni, Maltë dhe Sllovaki. Pjesa tjetër e vendeve anëtare të bllokut do të votojnë të dielën.