Policia e Shtetit ka dalë me një deklaratë zyrtare pas shqetësimeve të ngritura nga disa media online dhe nga qytetarë në rrjetet sociale për lëvizjet misterioze të një grupi muxhahedinësh në rrugët e vendit. Policia thotë se ka identifikuar në videot që qarkullojnë online dy shtetaset iraniane me leje qëndrimit të humanitare në Shqipëri, por se ato nuk përbëjnë kërcënim për sigurinë e të miturve. Dy shtetaset iraniane, të strehuara në kampin Ashraf 3 të Manzës u shoqëruan këtë të martë në ambientet e drejtorisë së policisë së Tiranës. Sipas policisë, ky është përfundimi që ka arritur grupi hetimor pasi veprimeve paraprake, ku nuk janë gjetur veprime të kundërligjshme. Ditët e fundit kanë qarkulluar në mediat online dhe rrjetet sociale disa video, ku qytetarë të shqetësuar ngrinin pretendime për veprime dashakeqe të dy iranianëve ndaj të miturve të pashoqëruar.