SHBA ka mbledhur të dhëna specifike të inteligjencës që sugjerojnë se zyrtarët e lartë të qeverisë iraniane u habitën nga sulmi i hamasit në izrael. Ekzistenca e këtyre të dhënave, ka hedhur dyshime kështu mbi idenë se irani është përfshirë në mënyrë direkte në planifikimin, burimet dhe miratimin e operacionit. Burimet nënvizojnë se komuniteti amerikan i inteligjencës nuk është ende i gatshëm të nxjerrë një konkluzion përfundimtar nëse teherani është përfshirë direkt apo jo dhe se po vazhdon të kërkojë prova për përfshirjen e tij. Sulmi i hamasit, të shtunën e kaluar, gjeti të papërgatitur izraelin por edhe Shtetet e bashkuara. Që pas sulmit, zyrtarë qeveritarë kanë nënvizuar se irani i ka siguruar mbështetje prej kohësh hamasit, përfshirë furnizimin me armë dhe financimin, që në mënyrë të padiskutueshme ka kontribuar në aftësinë e hamasit për të kryer një operacion kaq masiv. “Me shumë gjasa, Irani e dinte se Hamasi po planifikonte operacione kundër Izraelit, por nuk kishte asnjë ide për kohën kur do të ndodhnin ato apo për qëllimin e tyre”, thotë një zyrtar amerikan. “Edhe pse irani e ka mbështetur prej kohësh hamasin, ne aktualisht nuk kemi parë asnjë sinjal sipas të cilit irani ka mbështetur ose qëndron pas këtij sulmi të fundit”, shtoi ai.