Lideri suprem i Iranit Ayatollahu Ali Khamenei ka shpallur pesë ditë zie pas vdekjes së presidentit të vendit, Ebrahim Raisi. Raisi humbi jetën në një aksident me helikopter në një zonë malore të Iranit veriperëndimor, së bashku me ministrin e Jashtëm Hossein Amir-Abdollahian. Media shtetërore konfirmoi se ata u vranë pasi helikopteri me të cilin po udhëtonin u rrëzua të dielën. Ajatollahu Khamenei tha se ai i ofroi ngushëllimet e tij "popullit të dashur të Iranit". Raisi, 63 vjeç, ishte cilësuar si pasardhës i mundshëm i liderit suprem. Nënkryetari Mohammad Mokhber është emëruar për të marrë detyrat e përkohshme pas vdekjes së presidentit. Mokhber do të punojë me krerët e legjislaturës dhe gjyqësorit të Iranit për t'u përgatitur për zgjedhjet presidenciale brenda 50 ditëve, një periudhë kohore e përcaktuar në kushtetutën e Iranit për zëvendësimin e një presidenti që vdes në detyrë. Kabineti i Iranit ka emëruar gjithashtu zëvendësministrin e Jashtëm Ali Bagheri Kani si ushtrues detyre të ministrit të jashtëm. Fillimisht u raportua se helikopteri që transportonte Presidentin dhe shoqëruesit e tij kishte bërë një ulje të vështirë në kushte mjegulle. Zona ku ra helikopteri është afër kufirit me Azerbajxhanin, ku Raisi kishte takuar Presidentin Ilham Aliyev. Të hënën, Gjysmëhëna e Kuqe iraniane konfirmoi se trupat e presidentit dhe të tjerëve që vdiqën në aksident ishin gjetur dhe operacionet e kërkimit kishin përfunduar.