Irani ka kërcënuar Shtetet e Bashkuara të Amerikës se do të marrin shumë shpejt përgjigjen ndaj sulmeve që kryen në tre centralet bërthamore. Zëdhënësi i Korpusit të Gardës Revolucionare Islamike (IRGC), Ebrahim Zolfaghari, thotë se SHBA-të kanë hyrë drejtpërdrejt në luftë dhe ka shkelur "tokën e shenjtë" të Iranit. Ai tha se SHBA-të do të përballet me "pasoja të rënda, të paparashikueshme" përmes "operacioneve të fuqishme". Po ashtu ai foli dhe në anglisht ku pati një mesazh në drejtim të presidentit Donald Trump të cilin e quajti Bixhozxhi. "Z. Trump, bixhozxhiu! Ju mund ta filloni këtë luftë - por ne do të jemi ata që do ta përfundojmë!", kërcënoi Zolfaghari. Mesazhe kërcënuese janë lëshuar dhe nga ushtarakë të tjerë të lartë të ushtrisë iraniane. Mediat vendase kanë publikuar një video ku shihet komandanti i përgjithshëm i Iranit, Amir Hatami, duke folur me kolegët e tij oficerë në një dhomë operacionesh. Në video, ai thotë se sa herë që SHBA-të kanë kryer “krime” kundër Iranit në të kaluarën, ata “kanë marrë një përgjigje vendimtare dhe këtë herë do të jetë e njëjta gjë”. Ndërkohë, shefi i shtabit të ushtrisë iraniane, Abdolrahim Mousavi, ka lëshuar një deklaratë duke thënë se SHBA-të kanë hapur mundësinë që forcat e tij të ndërmarrin "çdo veprim" kundër trupave amerikane. Ai shtoi se Irani "nuk do të tërhiqet kurrë". Nga ana tjetër ushtria izraelite njoftoi sulme të tjera në gjashtë aeroporte në Iran, duke shkatërruar 15 avionë dhe duke dëmtuar pistat e fluturimit. Në një postim në rrjetet sociale, Forcat Mbrojtëse të Izraelit (IDF) thanë se objektivat ishin në Iranin perëndimor, lindor dhe qendror. IDF sqaroi se nga sulmet me dronë u shkatërruan avionë luftarakë F-15 dhe F-5, një aeroplan furnizimi me karburant dhe një helikopter sulmi AH-1 Cobra. Gjithashtu thuhet se pistat dhe bunkerët nëntokësorë janë dëmtuar. Ndërkohë Irani ende nuk e ka konfirmuar sulmin.