Bisedimet bërthamore mes Iranit dhe Shteteve të Bashkuara të Amerikës "nuk do të çojnë askund" nëse Uashingtoni këmbëngul që Teherani të ulë aktivitetin e tij të pasurimit të uraniumit në zero, citoi media shtetërore të hënën zëvendësministrin e jashtëm të vendit. I dërguari special i SHBA-së Steve Ëitkoff përsëriti qëndrimin e Uashingtonit të dielën se çdo marrëveshje e re midis SHBA-së dhe Iranit duhet të përfshijë kushtin për të mos pasuruar uranium, një rrugë e mundshme kjo për zhvillimin e bombave bërthamore. Teherani thotë se programi i tij i energjisë bërthamore ka qëllime tërësisht paqësore. "Pozicioni ynë mbi pasurimin është i qartë dhe ne kemi deklaruar vazhdimisht se është një arritje kombëtare nga e cila nuk do të tërhiqemi", tha zyrtari iranian. Gjatë vizitës së tij në rajonin e Gjirit javën e kaluar, Presidenti i SHBA-së Donald Trump tha se një marrëveshje ishte shumë afër, por se Irani duhej të lëvizte më shpejt. Uashingtoni po i ndërlikon negociatat duke shprehur pikëpamje të ndryshme në publik nga ato që diskutohen privatisht gjatë bisedimeve, tha një zëdhënës i ministrisë së jashtme iraniane të hënën. "Pavarësisht se dëgjuam deklarata kontradiktore nga amerikanët, ne ende po marrim pjesë në negociata", shtoi Esmail Baghaei, ndërsa të dyja palët prisnin që Omani, që po ndërmjetëson bisedimet, të njoftonte një raund të pestë negociatash. Gjatë mandatit të tij të parë si president, Trump tërhoqi Shtetet e Bashkuara nga një marrëveshje e vitit 2015 mes Iranit dhe fuqive botërore që vendosi kufizime të rrepta në aktivitetet e pasurimit të Teheranit në këmbim të lehtësimit nga sanksionet ndërkombëtare. Trump, i cili e quajti marrëveshjen e 2015-ës të njëanshme, që favorrizonte Iranin, gjithashtu rivendosi sanksionet gjithëpërfshirëse të SHBA-së ndaj Republikës Islamike. Kjo e fundit u përgjigj duke përshkallëzuar pasurimin.