Ministri i Jashtëm iranian, Abas Aragchi, ka paralajmëruar shefin e Kombeve të Bashkuara, Antonio Guterres, që Teherani është gati për përgjigje “të vendosur”, nëse Izraeli sulmon vendin e tij, si hakmarrje për sulmin me raketa të 1 tetorit. Republika Islamike lëshoi 200 raketa drejt Izraelit, si hakmarrje për vrasjet e dy aleatëve të tij të ngushtë, liderit të Hamasit, Ismail Haniyeh dhe liderit të Hezbollahut, Hassan Nasrallah, si dhe një gjenerali iranian. Lindja e Mesme vazhdon të jetë në alarm nga përshkallëzimi i mundshëm i luftës ndërsa Izraeli lufton grupet e mbështetura nga Irani, Hezbollahun në Liban dhe Hamasin në Gazë. Ministri izraelit i Mbrojtjes, Yoav Gallant tha javën e kaluar se masat hakmarrëse të vendit të tij do të jenë “vdekjeprurëse, precize dhe befasuese”. “Irani, duke bërë përpjekje për të mbrojtur paqen dhe sigurinë në rajon, është plotësisht i përgatitur për një përgjigje të vendosur”, ndaj Izraelit, tha ministri Araghchi, gjatë një bisede telefonike me Guterresin. Gjatë telefonatës, Araghchi u bëri thirrje Kombeve të Bashkuara që të përdorin të gjitha resurset “për t’iu dhënë fund krimeve dhe agresionit të regjimit izraelit dhe për të dërguar ndihma humanitare në Liban dhe Gazë”. Diplomati i lartë iranian ka biseduar përmes telefonit edhe me homologun e tij francez, Jean-Noel Barrot. Gjatë telefonatës, Araghchi ka përmendur nevojën e ndaljes së sulmeve izraelite në Liban, ka paralajmëruar kundër “aventurave të reja” të armikut të përbetuar, dhe ka bërë thirrje për largim të “pengesave” izraelite për të dërguar ndihma te personat e zhvendosur. Javët e fundit, Araghchi e ka vizituar Libanin, Sirinë, Arabinë Saudite, Katarin, Irakun dhe Omanin në përpjekje për t’i ulur tensionet.