Irani nuk do të dërgojë forca në Liban apo Gaza për t'u përballur me Izraelin, tha të hënën ministri i tij i jashtëm, pasi sulmet izraelite kanë vënë në shënjestër aleatët e vendit në rajon. "Nuk ka nevojë të dërgohen forca shtesë ose vullnetare të Republikës Islamike të Iranit," tha zëdhënësi i Ministrisë së Jashtme Nasser Kanani, duke shtuar se Libani dhe luftëtarët në territoret palestineze "kanë aftësinë dhe forcën e nevojshme për të mbrojtur veten kundër agresionit". Izraeli ditët e fundit ka kryer sulme të rënda ajrore në Liban kundër të ashtuquajturit "bosht i rezistencës", një rrjet i grupeve militante të lidhura me Iranin në rajon, duke përfshirë Sirinë, Jemenin dhe Irakun. Një sulm izraelit në Bejrut të premten vrau Hassan Nasrallah, kreun e grupit militant libanez Hezbollah që është armatosur dhe financuar nga republika islamike prej vitesh. “Ne nuk kemi marrë asnjë kërkesë për ndërhyrje nga asnjëra anë, përkundrazi, jemi të informuar dhe jemi të sigurt se nuk kanë nevojë për ndihmën e forcave tona”, u tha Kanani gazetarëve në Teheran.