Irani do të ndalojë sulmet e veta për sa kohë që Shtetet e Bashkuara bëjnë të njëjtën gjë, tha një zyrtar i lartë iranian për agjencinë e lajmeve Reuters. Ky zhvillim vjen ndërsa SHBA ndaloi fushatën e bombardimeve pasi këshilltarët e Presidentit Donald Trump i thanë atij se po mbaronin objektivat dhe shprehën shqetësime për shterimin e arsenalit amerikan. Pas 13 netësh intensifikimi të sulmeve ajrore të SHBA-së ndaj Iranit, Pentagoni pezulloi fushatën të premten vonë, pa raportuar asnjë sulm të SHBA-së as të shtunën dhe as të dielën. Irani, i cili kishte ndjekur çdo natë të sulmeve të SHBA-së me sulmet e veta ndaj vendeve fqinje që strehojnë baza amerikane, gjithashtu ka mbajtur zjarr deri më tani për dy ditë. Zyrtari iranian, duke folur në kushte anonimiteti, i tha Reuters se qëndrimi i Teheranit "mbetet 'dhëmb për dhëmb': nëse sulmet ndalen, edhe Irani do të ndalojë operacionet e tij. Ky mesazh i është përcjellë tashmë Shteteve të Bashkuara". Ambasadori i SHBA-së në Kombet e Bashkuara, Mike Ëaltz, tha ndërkohë se Trump kishte vendosur të ndalonte sulmet e SHBA-së për t’i dhënë më shumë kohë diplomacisë. Zyrtarët ushtarakë amerikanë në ditët e fundit kanë paralajmëruar se bombardimet gjatë dy javëve të fundit që synonin të pengonin kërcënimet iraniane ndaj anijeve në Ngushticën e Hormuzit kishin cuar në ezaurimin e objektivave të paracaktuara. Rifillimi i operacioneve të mëdha luftarake mbetet një mundësi, por Gjenerali Dan Caine, kryetar i Shtabit të Përbashkët të Ushtrisë, e ka paralajmëruar privatisht Trumpin se kjo do të mbartte rrezik duke pasur parasysh ndikimin negativ në rezervat e municioneve.