Irani ka thënë të hënën se planifikon t’i mbajë "këshilltarët ushtarakë" në Siri, pasi qyteti i dytë më i madh i këtij vendi aleat, Alepo, u mor nga rebelët përmes një ofensive të befasishme. Republika Islamike e Iranit, e cila e ka përkrahur presidentin sirian, Bashar al-Assad prej shpërthimit të luftës civile në Siri më 2011, ka thënë se ka angazhuar "këshilltarë ushtarakë" në Siri vetëm me ftesë të Damaskut. “Ne kemi hyrë në Siri shumë vjet më parë, me ftesë zyrtare të Qeverisë siriane, kur populli sirian përballej me kërcënimin e terrorizmit”, tha zëdhënësi i Ministrisë së Jashtme iraniane. “Këshilltarët tanë ushtarakë kanë qenë prezentë në Siri, dhe janë ende atje. Ata do të vazhdojnë të qëndrojnë në vend “në përputhje me dëshirën” e Qeverisë së Sirisë”, shtoi ai. Zëdhënësi nuk specifikoi nëse Irani do të rrisë numrin e forcave të veta në Siri, pas nisjes së ofensivës së rebelëve. Ai i bëri këto deklarata një ditë pasi ministri i Jashtëm i Iranit, Abbas Araghchi u takua me Assadin në Damask, si shenjë mbështetjeje për presidentin sirian.