Konflikti mes Izraelit dhe Iranit ka potencialin të zhysë në recesion ekonominë botërore, në rast se Irani vë në jetë kërcënimet e tij për bllokimin e ngushticës së Hormuzit. Kjo ngushticë detare përbën itinerarin më të rëndësishëm të anijeve për transportin e naftës. Hormuzi, mes Omanit dhe Iranit, lidh Gjirin Persik dhe shtetet eksportuese të naftës Bahrein, Kuvajt, Katar, Arabi Saudite dhe Emiratet e Bashkuara Arabe me Oqeanin Indian. Anijet çisternë vijnë këtu nga shumë vende të botës. Shumica transportojnë naftën bruto nga rajoni i Gjirit Persik për në Europë, Azi dhe Amerikën e Veriut. Pika më e rëndësishme e këtij itinerari është ajo përmes Gjirit Persik dhe Gjirit të Omanit, brezi më i ngushtë me një gjerësi prej 55 kilometrash, dhe korsia e lundrimit për anijet e mëdha është vetëm 3,7 kilometra. Ngushtica e Hormuzit ka rëndësi kyce për sigurimin e interesave strategjike të Iranit në rajon. Edhe në të shkuarën në kontekstin e sanskioneve ndërkombëtare ndaj Iranit, Teherani ka kërcënuar me mbylljen e ngushticës së Hormuzit. E sipas ekspertëve, nëse kjo ngushticë përfshihet në këtë luftë, e gjithë ekonomia botërore është në rrezik të madh. Hormuzi zë vendin e dytë ndër itineraret më të rëndësishme në botë për transportin e naftës. Humbjet si pasojë e bllokimit të kësaj rruge detare do të ishin të vështira të kompensoheshin. Si pasojë, cmimi i naftës dhe benzinës do të arrinte në qiell, edhe pse rritja ka nisur tashmë.