Irani ka lëshuar një valë të re sulmesh me raketa dhe dronë në të gjithë Gjirin dhe ka sulmuar anijet në Ngushticën e Hormuzit, ndërsa paralajmëroi SHBA-në dhe Evropën për veprime ushtarake. Një politikan i linjës së ashpër, Hossein Shariatmadari, i afërt me ajatollahun e vrarë ali Khamenei, tha se irani mund ta godasë evropën dhe do ta bëjë këtë. "Bazat ushtarake të atyre vendeve evropiane që do të vendosen në dispozicion të Amerikës mund dhe duhet të bëhen objektiva legjitime dhe të ligjshme për sulmet tona ushtarake", tha ai. Konservatori i Teheranit, i cili më parë ka mbajtur qëndrime të ashpra ndaj marrëveshjes bërthamore dhe çdo marrëveshjeje me SHBA-në, vazhdoi duke thënë se "Evropa është jashtëzakonisht e ndjeshme ndaj çdo sulmi të mundshëm nga Republika Islamike dhe ka praktikisht zero kapacitet për t'i bërë ballë atyre". Shariatmadari shtoi se vendet evropiane "e dinë që mund t'i godasim dhe se kur ta bëjmë këtë, do t’i godasim fort". Ndërkohë, të martën, kryetari i parlamentit të Iranit, Mohammad Bagher Ghalibaf postoi një mesazh në X duke folur për "konsolidimin e një ekuacioni të ri" në Ngushticën e Hormuzit. Duke pretenduar se vazhdimi i situatës aktuale është i patolerueshëm për Shtetet e Bashkuara, ndërsa Irani "nuk ka filluar ende", Ghalibaf deklaroi se "siguria e transportit detar dhe tranzitit të energjisë nën kontrollin e Shteteve të Bashkuara dhe aleatëve të saj është rrezikuar nga shkelja e armëpushimit dhe vendosja e një bllokade. Megjithatë, dëmi i tyre së shpejti do të kufizohet", shtoi ai.