Pretendimi i Presidentit amerikan Donald Trump se Irani së shpejti do të ketë një raketë që mund të godasë Shtetet e Bashkuara nuk mbështetet nga raportet e inteligjencës amerikane dhe duket se është i ekzagjeruar, sipas tre burimeve të njohura me raportet, duke hedhur dyshime mbi një pjesë të argumentit të tij për një sulm të mundshëm ndaj Republikës Islamike. Në fjalimin e tij para kombit, në Kongres të martën, Trump filloi t'i paraqesë publikut amerikan argumentet e tij pse SHBA-të mund të nisin sulme kundër Iranit, duke thënë se Teherani "po punonte për raketa që së shpejti do të arrinin" Shtetet e Bashkuara. Por nuk ka pasur ndryshime në një vlerësim të paklasifikuar të Agjencisë së Inteligjencës së Mbrojtjes të SHBA-së për vitin 2025 se Iranit mund t'i duhet deri në vitin 2035 për të zhvilluar një "raketë balistike ndërkontinentale ushtarakisht të qëndrueshme". “Presidenti Trump ka absolutisht të drejtë kur thekson shqetësimin e madh që paraqet Irani, një vend që kërkon ‘vdekjen e Amerikës’, duke zotëruar raketa balistike ndërkontinentale”, tha zëdhënësja e Shtëpisë së Bardhë, Anna Kelly.