Një ndihmës i presidentit të Iranit fajësoi Izraelin dhe Shtetet e Bashkuara për shpërthimet që vranë të paktën 95 persona një ditë më parë, gjatë ceremonive të përkujtimit për një ish-komandant iranian të vrarë katër vjet më parë në një sulm ajror amerikan. Departamenti i Shtetit tha se asnjë nga vendet nuk ishte përfshirë në dy shpërthimet e regjistruara. Incidenti ka ndezur frikën e zgjerimit të konfliktit në rajon ndërkohë që Izraeli vazhdon luftën kundër Hamasit, ndërsa rebelët Huthi me bazë në Jemen, aleatë me Iranin, vazhdojnë sulmet ndaj anijeve tregtare në Detin e Kuq. Të paktën 95 persona u vranë dhe më shumë se 200 të tjerë raportohet se u plagosën nga shpërthimet që ndodhën në ngjarjen e organizuar për të shënuar 4-vjetorin e vrasjes së gjeneralit, Qassem Soleimani, që udhëhiqte forcat elite Kuds, të Gardës Revolucionare Islamike. Ai u vra në një sulm me dron të kryer nga SHBA-ja në Irak në janarin e vitit 2020. Shpërthimet ndodhën në qytetin Kerman, ku është varrosur Soleimani, 820 kilometra në juglindje të kryeqytetit iranian, Teheran. Shtetet e Bashkuara hodhën poshtë sugjerimet se Izraeli ose Uashingtoni qëndronin pas shpërthimeve. "Shtetet e Bashkuara nuk është përfshirë në asnjë mënyrë dhe çdo sugjerim për të kundërtën është qesharak", tha zëdhënësi i Departamentit të Shtetit, Mattheë Miller. “Ne nuk kemi as arsye të besojmë se Izraeli ishte i përfshirë në këtë shpërthim”, shtoi ai. Por, Mohammad Jamshidi, një zëvendës politik i presidentit të Iranit, Ebrahim Raisi, tha më vonë se Shtetet e Bashkuara dhe Izraeli kanë "përgjegjësi" për tragjedinë. “Përgjegjësia për këtë krim është e SHBA-së dhe e regjimeve zioniste dhe terrorizmi është vetëm një mjet”, tha ai pa dhënë asnjë argument për këto pretendime. Presidenti Raisi kishte thënë më herët në një deklaratë se, “autorët... e këtij akti frikacak do të identifikohen dhe për aktin e tyre do të ndëshkohen së shpejti nga forcat e sigurisë dhe rendit”. Disa raporte të publikuara të enjten thonë se numri i të vdekurve është më shumë se 100, me 211 të tjerë të plagosur.