Një zëdhënës i ministrisë së jashtme iraniane tha të hënën se Irani po shqyrton detajet e proceseve të ndryshme diplomatike për të menaxhuar tensionet me SHBA-në, duke shtuar se Teherani shpreson për rezultate në ditët në vijim. Mes një grumbullimi masiv ushtarak të Marinës Amerikane pranë Iranit, Presidenti Amerikan Donald Trump u tha gazetarëve javën e kaluar se Irani po "bisedonte seriozisht" me Uashingtonin, disa orë pasi zyrtari më i lartë i sigurisë së Teheranit, Ali Larijani, tha në X se ishin duke u zhvilluar marrëveshjet për negociata. "Vendet rajonale janë ndërmjetësi për mesazhet që janë shkëmbyer. Janë shkëmbyer pika të ndryshme dhe aktualisht po vendosim dhe po shqyrtojmë detajet e secilit proces diplomatik që shpresojmë se do të sjellë rezultate në ditët në vijim", tha zëdhënësi. "Kjo ka të bëjë me procesin dhe kornizën e bisedimeve", shtoi ai. Një ditë më parë, ajatollahu Ali Khamenedi paralajmëroi SHBA-në kundër një sulmi mbi iranin, pasi sipas tij, kjo do të shkaktonte një luftë rajonale. Pas përgjigjes vdekjeprurëse të autoriteteve iraniane ndaj protestave antiqeveritare që arritën kulmin muajin e kaluar, Trump ka kërcënuar me veprime ushtarake dhe ka urdhëruar dërgimin e një grupi sulmi në Lindjen e Mesme. I pyetur në lidhje me paralajmërimin e udhëheqësit iranian, Trump u tha gazetarëve të dielën: "Sigurisht që ai do ta thotë këtë. Shpresojmë të arrijmë një marrëveshje. Nëse nuk arrijmë një marrëveshje, atëherë do të zbulojmë nëse ai kishte të drejtë apo jo", tha Trump.