Teherani u ka thënë shteteve arabe të Gjirit se do të ishte "e papranueshme" nëse ato do të lejonin përdorimin e hapësirës së tyre ajrore ose bazave ushtarake kundër Iranit dhe paralajmëroi se çdo veprim i tillë do të sillte një përgjigje, tha një zyrtar i lartë iranian. Komentet vijnë në mes të shqetësimit në rritje për hakmarrjen e mundshme izraelite për sulmin iranian me raketa të javës së kaluar, ndërsa ministri i jashtëm i Iranit Abbas Araqchi u drejtua për në Arabinë Saudite dhe shtetet e tjera të Gjirit për bisedime të mërkurën. Kjo pason diskutimet mes Iranit dhe kryeqyteteve arabe të Gjirit javën e kaluar në margjinat e një konference të Azisë në Katar, kur shtetet e Gjirit kërkuan të sigurojnë Iranin për neutralitetin e tyre në çdo konflikt midis Teheranit dhe Izraelit. "Irani e bëri të qartë se çdo veprim i një vendi të Gjirit Persik kundër Teheranit, qoftë përmes përdorimit të hapësirës ajrore apo bazave ushtarake, do të konsiderohet nga Teherani si një veprim i ndërmarrë nga i gjithë grupi dhe Teherani do të përgjigjet në përputhje me rrethanat," tha zyrtari i lartë iranian. Presidenti i SHBA Joe Biden pritet të mbajë një telefonatë të mërkurën me kryeministrin izraelit Benjamin Netanyahu që do të përfshijë edhe diskutimin e çdo plani për të goditur Iranin, sipas një personi të njohur me këtë çështje. Biden tha të premten e kaluar se do të mendonte për alternativa të tjera përvec goditjes së naftës iraniane nëse do të ishte në vendin e Izraelit. Javën e kaluar ai tha gjithashtu se nuk do të mbështeste Izraelin që të godiste objektet bërthamore iraniane.