"Sulmet tona i kanë kthyer ata në Epokën e Gurit", me këto fjalë, të përdorura edhe në të kaluarën, Presidenti amerikan Donald Trump argumentoi se ofensiva ushtarake amerikane kundër Iranit ka zvogëluar në mënyrë drastike aftësitë ushtarake të Teheranit. Sipas Trumpit, që nga fillimi i luftës më 28 shkurt, forcat amerikane kanë shkatërruar 159 anije, afërsisht 200 avionë, sisteme radarësh, mbrojtje kundërajrore dhe 84% të kapacitetit të tij të prodhimit të armëve. Për këtë arsye, përfundoi Trump, Irani është "shumë i ndryshëm" nga sa ishte katër muaj më parë: "Nuk do të jetë më në gjendje të bullizojë e ngacmojë vendet e tjera në Lindjen e Mesme." Trump tha se tani SHBA është në kontrollin e ngushticës së Hormuzit dhe se ai do të rimbursohet nga vendet që SHBA po mbron. "Dua të rimbursohem sepse po mbrojmë një pjesë shumë të pasur të botës. Po shpenzojmë para, dhe duhet të rimbursohemi për mbrojtjen që ofrojmë", tha Trump në një takim me gazetarët në Zyrën Ovale. "Nuk kemi nevojë drejtpërdrejt, por kemi nevojë sepse po mbrojmë aleatët tanë", shtoi ai.