Irani thotë se "e ka gishtin në këmbëz" pasi Donald Trump refuzoi të zbulonte nëse SHBA-të do të vepronin ushtarakisht kundër vendit. Presidenti amerikan më herët kishte paralajmëruar se mund të ndërmerrte veprime ushtarake kundër Iranit për vrasjen e protestuesve paqësorë dhe kërcënimin e tij me ekzekutim masiv të të ndaluarve në demonstrata. I pyetur nga gazetarët ndërsa fluturonte për në Florida nëse kishte marrë një vendim përfundimtar, presidenti amerikan tha: "Sigurisht që nuk mund t'jua them këtë, por ne kemi anije shumë të mëdha dhe të fuqishme që shkojnë në atë drejtim, siç e dini. Nuk mund t'ju them më shumë por shpresoj që ata të negociojnë diçka që është e pranueshme". Trump u pyet gjithashtu nëse Teherani do të inkurajohej nga tërheqja e SHBA-së. Ai u përgjigj: "Epo, disa njerëz mendojnë kështu dhe disa jo. Dhe nëse mund të bësh një marrëveshje të negociuar që do të ishte e kënaqshme, pa armë bërthamore, kjo është dicka e mirë. Nuk e di nëse do ta bëjnë por ata po flasin me ne seriozisht".