Irani po shqyrton sulme ndaj objektivave ushtarake amerikane në Evropë nëse Donald Trump e përshkallëzon luftën, ndërsa Teherani po vlerëson mundësitë për të rritur riskun e konfliktit. Financial Times citon burime pranë regjimit të Teheranit të cilat thonë se forcat iraniane kanë shqyrtuar mundësinë e goditjes së objektivave amerikane në vendet e Evropës Juglindore, siç është Bullgaria, e cila muajin e kaluar miratoi përdorimin e bazës së saj ajrore Bezmer për furnizimin e avionëve amerikanë. Një nga burimet shtoi se Qiproja, ku një bazë ajrore britanike u godit nga një dron në mars, është gjithashtu mes objektivave të mundshëm për hakmarrje në rast të një ofensive të re amerikane. Sipas burimeve të brendshme, Teherani ka vlerësuar veçanërisht mundësinë e sulmit të kabllove me fibra optike nënujore në Ngushticën e Hormuzit në rast të një përshkallëzimi. "Nëse SHBA-të do të shkonin shumë larg, Irani do të mbrohej me çdo kusht, duke e zgjeruar veprimin e tij përtej rajonit dhe duke goditur gjithashtu Evropën", deklaroi një nga burimet. Ndërsa burimi tjetër tha se Irani nuk do të kishte “asnjë kufizim” në përgjigjen e tij ndaj veprimeve ushtarake të SHBA-së.