Irani ka furnizuar rusinë me një numër të madh raketash balistike tokë tokë, thonë të paktën gjashtë burime për agjencinë e lajmeve Reuters, duke thelluar kështu bashkëpunimin ushtarak mes dy vendeve që janë nën sanksione perëndimore. Dërgesa e iranit e rreth 400 raketave, përfshin shumë nga familja Fateh 110, armë balistike me rreze të shkurtër veprimi, dhe Zolfaghar. Raketa e lëvizshme mund të godasë shënjestra në një distancë nga 300 deri në 700 km, thonë ekspertët. Ministria iraniane e mbrojtjes dhe rojat revolucionare, një forcë elitë që mbikqyr programin balistik të iranit, nuk kanë bërë komente pas publikimit të raportit. Edhe ministria ruse e mbrojtjes ka heshtur. Dërgesat nisën në fillim të janarit pasi një marrëveshje u finalizua në takimet e zhvilluara në fund të vitit të kaluar mes zyrtarëve ushtarakë iranianë dhe atyre rusë, që u mbajtën në Teheran dhe Moskë. NJë zyrtar iranian, që si burimet e tjera nuk donte të identifikohej, tha se ka patur të paktën katër ngarkesa me raketa që janë dërguar dhe do të ketë ngarkesa të tjera në javët në vijim. Sipas një zyrtari tjetër iranian, disa prej raketave janë dërguar në rusi me anije, përmes detit kaspik ndërsa të tjera janë transportuar me avion. “Nuk ka asnjë arsye që ta mbajmë të fshehtë. Do të ketë akoma më shumë dërgesa. Ne na lejohet të eksportojmë armë në cdo vend që të duam”, thotë zyrtari Iranian.