Irani sekuestroi dy anije në Ngushticën e Hormuzit ndërsa shtrëngoi kontrollin e tij mbi rrugën ujore strategjike pasi Presidenti amerikan Donald Trump njoftoi se po anulonte sulmet për një kohë të pacaktuar, pa asnjë shenjë të rifillimit të bisedimeve të paqes. Statusi i një armëpushimi dy-javor, që duhej të kishte skaduar më herët këtë javë, mbetet i paqartë. Në një kthesë 180 gradëshe pas kërcënimit për të rifilluar luftën, Trump bëri atë që dukej të ishte një njoftim i njëanshëm të martën se SHBA-të do të zgjasë armëpushimin. Por zyrtarët iranianë nuk thanë se kishin rënë dakord për ndonjë zgjatje të armëpushimit dhe kritikuan vendimin e Trump për të mbajtur bllokadën detare nga ana e Marinës Amerikane, që konsiderohet nga Irani si një akt lufte. Kryetari i parlamentit të Iranit dhe negociatori kryesor Mohammad Baqer Qalibaf tha se një armëpushim i plotë kishte kuptim vetëm nëse bllokada hiqej. Rihapja e Ngushticës së Hormuzit, pika e ngushtë e kalimit që transportonte një të pestën e tregtisë botërore të naftës para luftës, është e pamundur me një "shkelje kaq flagrante të armëpushimit", tha Qalibaf në mediat sociale. "Ju nuk i arritët qëllimet tuaja përmes agresionit ushtarak dhe nuk do t'i arrini ato as duke ngacmuar", shkroi ai në përgjigjen e tij të parë ndaj njoftimit të Trump. "E vetmja mënyrë është njohja e të drejtave të popullit iranian". Garda Revolucionare Islamike kapi dy anije dhe i shoqëroi ato në brigjet iraniane, sipas deklaratave të kompanive të transportit detar dhe agjencisë gjysmëzyrtare të lajmeve Tasnim të Iranit. Garda Revolucionare akuzoi anijet, Epaminondas me flamur Liberian dhe MSC Francesca me flamur Panamez, se kishin operuar pa lejet e kërkuara dhe kishin ndërhyrë në sistemet e tyre të navigimit. Një anije e tretë kontejnerësh, me flamur Liberian, u qëllua në të njëjtën zonë, por nuk u dëmtua dhe kishte rinisur lundrimin, sipas burimeve të sigurisë detare. Për SHBA-në, duke qenë se anijet e kapura nga irani nuk janë amerikane apo izraelite, sekuestrimi i tyre nuk është shkelje armëpushimi, por thjeshtë një akt piraterie. Ushtria amerikane tha ndërkohë se deri më tani kishte udhëzuar më shumë se 30 anije të ktheheshin pas si pjesë e bllokadës.