Me shtimin e popullsisë, po rritet edhe nevoja për më shumë vende parkimi në kryeqytet. Bashkia e Tiranës publikoi projektin që synon të shtojë kapacitetet e parkimit në një nga zonat më të frekuentuara të kryeqytetit. Në hyrjen veriore të Parkut të Madh të Liqenit, pranë sheshit “ Frederik Shopen” është konceptuar një parim i ri nëntokësor. Sipas projektit, ky parkim pritet të ketë dy nivele, ku kati – 1 do të shërbejë për automjetet, ndërsa kati -2 do të jetë i dedikuar për autobusër. Pritet që ky projekt të zgjidhë nevojën e qytetarëve për më shumë vende parkimi, pa zënë hapësirat publike në sipërfaqe. Mbi parkim, hapësira do të rikthehet në funksion të qytetarëve, me gjelbërim, pemë dhe rrugëkalime për këmbësorët. Parkimi do të pajiset gjithashtu me sisteme ventilimi, kamera monitorimi, kontroll aksesi dhe ndriçim modern.