Investimi në pasuri të paluajtshme për t’i dhënë me qira vijon të jetë një nga alternativat e preferuara në Shqipëri, por kthimi nga ky investim mbetet modest, veçanërisht në raport me rritjen e fortë të çmimeve të banesave. Të dhënat e AirDNA tregojnë se gjatë 6-mujorit të parë të vitit 2026, të ardhurat mesatare mujore nga qiradhënia e pronave të listuara në Airbnb në Tiranë ishin rreth 765 euro. Në të njëjtën kohë, sipas indeksit Keydata Albania, çmimi mesatar i shitjes së banesave në Tiranë ka arritur në rreth 2,100 euro për metër katror në mesin e këtij viti. Duke krahasuar të ardhurat vjetore nga qiraja me çmimin e blerjes, kthimi bruto nga investimi rezulton rreth 5.5% në vit. Por kjo është vetëm një llogaritje bruto. Pas zbritjes së kostove të mobilimit, mirëmbajtjes, taksave, shpenzimeve të tjera dhe amortizimit të pronës, kthimi neto do të ishte ndjeshëm më i ulët, nën nivelin 5%.