Shqipëria vijon të mbajë një nivel rekord të kredive të nënshkruara me kreditorët ndërkombëtarë, por ende të patërhequra, duke vonuar investimet publike dhe duke i shkaktuar buxhetit të shtetit miliona euro kosto çdo vit. Sipas të dhënave të Ministrisë së Financave, në fund të gjashtëmujorit të parë të vitit 2026, vlera e kredive të kontraktuara, por të pashfrytëzuara arriti në 1.96 miliardë euro, pranë nivelit rekord të regjistruar në fund të vitit 2025. Për krahasim, në vitin 2020 kjo shumë ishte vetëm 644 milionë euro, çka do të thotë se është trefishuar brenda gjashtë viteve. Pjesa më e madhe e këtij portofoli, sipas revistës Monitor, i përket kreditorëve shumëpalësh, me rreth 1.37 miliardë euro, ndërsa kreditë dypalëshe përbëjnë afërsisht 592 milionë euro. Edhe pse interesi mbi huanë zakonisht nis të paguhet vetëm pasi fondet disbursohen, institucionet financiare ndërkombëtare aplikojnë komisione angazhimi për shumat e patërhequra. Këto tarifa paguhen për faktin se fondet mbahen në dispozicion të huamarrësit, pavarësisht nëse përdoren apo jo.