Fondi Monetar Ndërkombëtar përshëndeti ndryshimet në ligjin për tatimin e të ardhurave, ku risitë e prezantuara nga qeveria janë përfshirja në skemën e tatimit të profesioneve të lira, të qiradhënësve ditorë dhe të fitimeve nga platformat online, përfshirë këtu edhe të influencuesve të rrjeteve sociale. Deklarata u bë gjatë konferencës së përbashkët të organizuar të premten nga Ministria e Financave, Banka e Shqipërisë dhe FMN. Përfaqësuesit e FMN vlerësuan konsolidimin fiskal dhe parashikimin e qeverisë për suficit në vitin e ardhshëm. Rekomandimet e fondit lidhen me prioritetet që duhet të këtë qeveria shqiptare, përmes financimit të projekteve produktive dhe që sigurojnë të ardhura afatgjatë për ekonominë, si dhe më shumë kujdes në monitorimin e koncesioneve që ka dhënë. Ulja e mëtejshme e inflacionit, vëren FMN është kritike, veçanërisht për të mbrojtur familjet e cenueshme dhe mbështet synimin e Bankës së Shqipërisë për të vazhduar me normalizimin e politikës monetare dhe uljen e mëtejshme te inflacionit.