Ndërsa qeveria po përgatitet të nisë fazën tjetër të negociatave me Bashkimin Europian pas kalimit të IBAR-it, deputetja e Partisë Demokratike, Jorida Tabaku, ka ngritur shqetësimin për mungesën e përgatitjes reale të ekonomisë shqiptare dhe sidomos të bizneseve për standardet europiane. Në një video të publikuar në rrjetet sociale, Tabaku thekson se procesi i integrimit nuk mund të reduktohet në miratim ligjesh në letër, ndërkohë që bizneset shqiptare mbeten të papërgatitura për kostot dhe standardet që kërkon tregu europian. Sinkron - “Integrimi duhet të kishte qenë prej kohësh kryefjalë edhe për biznesin. Duhej bërë analizë e kostove dhe përfitimeve, konsultime reale me sipërmarrjen dhe përgatitje konkrete për mënyrën se si legjislacioni europian do të ndikojë ekonominë shqiptare,” Deputetja demokrate ngre pyetje mbi aftësinë e bizneseve për të përballuar investimet e reja, teknologjinë dhe mungesën e fuqisë së kualifikuar punëtore. Ajo lidh procesin e integrimit edhe me problemet ekonomike dhe sociale të vendit, nga pagat dhe pensionet tek boshllëqet sociale, duke theksuar se Shqipëria vazhdon të mbetet ndër vendet më problematike në rajon për standardin e jetesës.