Ministri për Evropën dhe Punët e Jashtme, Igli Hasani, nis nesër vizitat zyrtare në Suedi dhe Finlandë me ftesë të homologëve të tij. Temat kryesore të diskutimit në vendet pritëse pritet të jenë bashkëpunimi në sektorin e ekonomisë dhe turizmit, mbështetja e Finlandës ndaj procesit të integrimit të Shqipërisë në BE, mbështetja për Ukrainën si dhe bashkëpunimi në kuadër të NATO-s dhe kryesinë e OSBE-së për vitin 2025. Gjatë qëndrimit dy ditor në Stokholm, Ministri Hasani do të ketë takime me grupe interesi dhe agjenci suedeze të fokusuara në drejtim të tregtisë dhe investimeve. Suedia dhe Shqipëria ndajnë të njëjtat e qëndrime lidhur me zgjerimin e BE-së, integrimin e Ballkanit Perëndimor, agresionit rus ndaj Ukrainës dhe mbështetjen ndaj kësaj të fundit. Ndërkohë që nga marsi i këtij viti do të bashkëpunojnë ngushtë edhe si aleatë në aleancën e NATO-s. Më 12 dhe 13 qershor Hasani vijon takimet në Finalndë me Presidentin Alexander Stubb, homologen Elina Valtonen, si dhe Ministrin për BE dhe Drejtimin e Pronësisë, Anders Adlercreutz. Ministri do të vizitojë Qendrën Evropiane për Kërcënimet Hibride në Helsinki dhe do të takohet me grupin parlamentar të miqësisë Shqipëri Finlandë.