Koha e gjatë për shqyrtimin dhe dhënien e vendimit nga gjykatat në vend ndaj ankesave të qytetarëve nuk janë faktorët e vetëm të vonesave në drejtësi. Avokati i Popullit citon në raportin e vjetor të depozituar në Kuvend se një tjetër arsye lidhet me zbatimin e vendimeve të gjykatave. Në raport thuhet se institucionet shpesh vonojnë, zvarrisin ose nuk zbatojnë fare vendimet e gjykatave, sidomos kur bëhet fjalë për çështjen e pronave. Avokati rendit se përgjatë vitit 2025 ka marrë gati 170 ankesa për çështje pronësie, ose 11 për qind e totalit të tyre. Një pjesë lidhet me moszbatimin nga ana e institucioneve qendrore dhe vendore të vendimeve të gjykatave. Kjo tregon, thuhet në raport, për problematika të vazhdueshme në garantimin e sigurisë juridike të qytetarëve në raport me të drejtën e pronës. Në praktikë, konstatohet mungesë kapacitetesh institucionale në trajtimin e volumit të lartë të kërkesave dhe në ndjekjen e procedurave komplekse të regjistrimit dhe legalizimit të pronës.