Një qytetar i Prishtinës është shoqëruar nga Policia e Kosovës pasi u gjet në një makinë në rrugën “Vëllezërit Fazliu”, duke pretenduar se ishte rrëmbyer. Sipas zëdhënësit të policisë për rajonin e Prishtinës, Agron Borovci, familjarët e 45-vjeçarit kishin raportuar më 5 maj, rreth orës 00:45, se ai ishte zhdukur që nga 30 prilli dhe se kishin marrë mesazhe kërcënuese nga të ashtuquajtur rrëmbyes, të cilët kërkonin një shumë parash për lirimin e tij. Policia nisi menjëherë hetimet në bashkëpunim me prokurorinë, dhe pas veprimeve të koordinuara hetimore, arriti të lokalizojë burrin, i cili rezultoi se nuk ishte rrëmbyer, por vetë kishte inskenuar ngjarjen. Ai kishte dërguar mesazhet kërcënuese me qëllim përfitimi financiar nga familjarët. Policia e Kosovës u bën thirrje qytetarëve të mos ndërmarrin veprime mashtruese që jo vetëm keqpërdorin burimet institucionale, por edhe krijojnë panik të panevojshëm në publik.