Inflacioni pësoi një rritje të qënësishme përgjatë muajit prill, udhëhequr nga rritja e karburanteve që pati efekt zinxhir më pas edhe në sektorët e tjerë të ekonomisë. Instat raportoi se inflacioni i matur me indeksin e çmimeve të konsumit u rrit në 2.8 për qind, ose 0.5 pikë përqindjeje më shumë se inflacioni i muajit mars. Karburantet udhëhoqën me 4.7 për qind, ndjekur më pas nga transporti, që në terma vjetorë kishte edhe rritjen më të madhe me 8.5 për qind. Rritje u raportuan edhe në sektorin e shërbimeve financiare dhe sigurimet, arsimi, restorantet dhe hoteleria dhe ushqimet. Gjithsesi, edhe pas rritjes së sforcuar nga lufta në Lindjen e Mesme, inflacioni në nivelin 2.8 për qind për muajin prill mbetet poshtë objektivit të Bankës së Shqipërisë, që synon 3 për qind brenda gjashtë muajve të parë të këtij viti.