Rritja e çmimeve për konsumatorët në Turqi, sipas të dhënave zyrtare, është ngadalësuar. Në muajin korrik konsumatorëve të shërbimeve dhe mallrave u është dashur të paguajnë 33,52 për qind më shumë krahasuar me një vit më parë dhe kjo sipas entit të statistikave ishte kuota më e ulët e rritjes së çmimeve që nga nëntori 2021. Në qershor kuota e rritjes së çmimeve ishte 35,05 përqind. Nga qershori në korrik çmimet ranë me 2,06 përqind. Shtrenjtimi mujor u ndikua nga rritja e çmimeve për banimin me 5,78 përqind si dhe për pijet alkohoolike dhe duhanin me 5,69 përqind. Kuota zyrtare është prej pesë vitesh dyshifrore. Në fund të vitit 2022 u arrit kuota më e lartë me 85 përqind. Ekonomistët megjithatë kanë dyshime për të dhënat e publikuara zyrtarisht. Grupi studimor Enag llogarit që kuota e inflacionit në korrik ka qenë 65,1 përqind. Banka Qendrore turke së fundi ka parashikuar një përshpejtim të përkohshëm mujor të inflacionit për shkak të rritjes së taksave për karburantin dhe duhanin si edhe për shkak të çmimeve të larta të energjisë. Banka qendrore i uli në korrik normat e interesit nga 46 në 43 përqind duke i hapur rrugë kështu një raundi të ri të liberaliizmit të politikës së saj monetare. Vitin e kaluar në luftën kundër inflacionit kjo bankë reagoi me rritjen e interesave. Më herët, presidenti turk Rexhep Tayip Erdogan e kishte refuzuar politikën strikte monetare pavarësisht zhvleftësimit të vrullshëm të monedhës duke vepruar kështu në kundërshtim me eksperiencën e zakonshme.