Pagat në Shqipëri vijojnë të rriten në terma nominalë, por inflacioni po gërryen një pjesë të mirë të kësaj rritjeje, duke bërë që fuqia reale blerëse e punonjësve të mbetet dukshëm më e ulët. Sipas të dhënave të INSTAT, në tremujorin e parë të vitit 2026 paga mesatare mujore bruto arriti në 90,119 lekë, me një rritje vjetore prej 9.6%. Ndërkohë, paga reale, e llogaritur sipas fuqisë blerëse dhe e korrigjuar me inflacionin, ishte 73,822 lekë, me një rritje vjetore prej 7%. Të dhënat tregojnë se në vitin 2021 diferenca mes pagës nominale dhe reale ishte vetëm 1,224 lekë, ndërsa gjatë viteve pasuese, me rritjen e inflacionit, hendeku është thelluar vazhdimisht. Ekspertët vlerësojnë se, megjithëse pagat janë rritur, fuqia për të blerë mallra dhe shërbime nuk ka ndjekur të njëjtin ritëm. Sipas analizës, rritja e pagave në sektorin publik dhe privat është ndikuar më shumë nga mungesa e fuqisë punëtore dhe emigracioni sesa nga rritja e produktivitetit. Sipas revistës monitor, rritja e të ardhurave ka nxitur konsumin, ndërsa prodhimi vendas nuk ka ecur me të njëjtin ritëm, duke ushtruar presion mbi çmimet. Ndër grupet më të prekura mbeten pensionistët, të cilët përfitojnë kryesisht vetëm indeksimin e pensioneve sipas inflacionit.