Pas incidentit të ndodhur gjatë protestës së mbrëmshme në Tiranë, ku një vajzë e maskuar hoqi flamurin izraelit, ka reaguar edhe ambasadorja e Izraelit në Tiranë Galit Peleg. Në një deklaratë të ndarë në rrjetet sociale, ambasadorja shprehet se e respekton të drejtën e qytetarëve shqiptarë, por sipas saj, grisja e flamurit është një veprim që dëmton imazhin e Shqipërisë. “Si ambasadore e një shteti demokratik, unë besoj në të drejtën e popullit shqiptar për të ushtruar të drejtën e tij qytetare për të protestuar. Megjithatë, një veprim i tillë jo vetëm që nuk e çon përpara protestën publike, por gjithashtu turpëron popullin shqiptar dhe trashëgiminë e tij krenare”, shkruan Peleg ndër të tjera, ndërsa falënderoi edhe ministrin Ferit Hoxha që dënoi më herët aktin. Lidhur me incidentin, pas reagimit të Ministrisë së Jashtme, edhe zv.kryeministrja Albana Koçiu, e cila shprehet se akti është provokim që cenon normat themelore të respektit ndaj përfaqësive diplomatike dhe bie ndesh me frymën e Konventës së Vjenës për Marrëdhëniet Diplomatike. “Ky akt i turpshëm dhe i izoluar bie ndesh me traditën tonë të gjatë të harmonisë, respektit dhe mbrojtjes së tjetrit, parime këto që kanë karakterizuar popullin shqiptar përgjatë historisë”-shkruan ndër të tjera numri dy i qeverisë.