Përplasjet e forta mes dy kampeve të demokratëve prodhuan jo pak incidente dhe tensione. Për karrigen e lidershipit të demokratëve, u kërcënua rëndë jeta e mbështetësve të Bashës e Berishës. 8 janari filloi me ofendime e përplasje fizike mes militantëve të ish kryeministrit Berisha dhe sekretarit të kësaj force politike, Roland Bejko. Ky i fundit nuk arriti të futej në ambjentet e selisë, pas përlasjes fizike me protestuesit. Partia demokratike e konsideroi dhunën e përdorur në këtë protestë, si fytyrën e vërtetë të Sali Berishës. Tentativat e mbështetësve të Berishës për të çelur dyert e selisë blu arritën akte ekstreme. Disa prej militantëve goditën derën e blinduar me leva e çekiç, duke deklaruar se duan të hapin shtëpinë e lirisë dhe të kthehen atje ku përkasin. Të tjerë protestues përdorën shkallët për t’u futur nga dritaret e katit të dytë të godinës së selisë së demokratëve, por u hasën me përdorimin e gazit lotsjellës.