Samiti i Presidentit të Shteteve të Bashkuara të Amerikës, Joe Biden me presidentin e Rusisë, Vladimir Putin, filloi me disa minuta zhurmë të ashpër midis gazetarëve dhe forcave të sigurisë të SHBA-së dhe Rusisë. Organizatorët në samitin e së mërkurës në Gjenevë hapën dhomën e takimit për gazetarët para se të fillojnë bisedimet. Megjithatë, forcat dhe zyrtarët e sigurisë ruse dhe amerikane fillimisht bllokuan gazetarët, ndërsa ata u përpoqën të hynin në dhomë. Skena më pas u shndërrua në disa minuta kaos brenda dhomës së takimeve. Gazetarët amerikanë thanë se sigurimi dhe gazetarët rusë i kapën ata prej krahëve e rrobave në përpjekje për t’i mbajtur prapa. Gazetarët amerikanë u munduan që ta hapnin rrugën vetë, ndërsa një reporter amerikan u rrëzua përtokë. Para se të qetësohej skena, disa nga turma bërtitën se ishin duke u shtypur në përleshje. Biden dhe Putin e kaluan duke qeshur me rrëmujën.