Pas vendimit të Gjykatës së Posaccme për të kaluar për gjykim dosjen e Inceneratorit të Fierit, Gurali Brahimllari, avokati i ish-Zyrtarit të FSH-së, Arben Dervishaj, pretendon se hetimet janë devijuar. Sipas avokatit, faturat për të cilat klienti i tij ka nënshkruar janë të falsifikuara dhe kjo sipas tij është e provuar. “Ne kërkuam papërdorshmërinë e këtyre faturave që kanë dalë të falsifikuara. Janë të provuara që këto fatura janë të falsifikuara me imitim ose të vendosura mbi xham. Nuk gjendet asnjë faturë e shkruar dhe nënshkruar prej të pandehurit që unë mbroj. Unë mendoj se Prokuroria lidhur me një akuzë për mashtrim, lidhur me pagesat që janë për firmën italiane që është fituese e koncesionit, ka devijuar hetimet,” tha ndër të tjera avokati. Nga ana tjetër, Avokati i ish deputetit socialist Alqi Bllako këmbëngul se çështja penale ndaj tij duhet pushuar. Sokol Hazizaj tha se në seancën paraprake Gjykata nuk u shpreh për kërkesën për gjykim të shkurtuar.