Në kryeqytet po vijon aksioni për lirimin e hapësirave publike në çdo lagje ku bizneset private kanë vendosur tenda, karrige dhe tavolina duke cënuar pronën publike. Sipas të dhënave të Inspektoriatit të Mbrojtjes së Territorit deri më tani është liruar 17 mijë 334 metër katror pronë publike në Tiranë. 352 biznese private janë treguar bashkëpunuese me institucionet shtetërore, duke shfaqur gatishmërinë për t’i çmontuar vetë tendat apo strukturat e paligjshme në hapësirën publike. Tek ish fusha e Aviacionit thuajse 90 për qind e bizneseve kanë liruar vullnetarisht hapësirën publike, duke u ndërgjegjësuar me aksionin e ndërmarrë gjatë ditëve të fundit. Shifrat flasin për 1428 subjekte të cilave u ka mbërritur një njoftim nga Inspektoriati i Mbrojtjes së Territorit ku kërkohet lirimi i hapësirës publike. Në 32 raste ka pasur akt konstatimi kundravajtje. Aksioni i lirimit të hapësirave publike është shtrirë në gjithë vendin. Kryeministri Edi Rama ka paralajmëruar ndjekje ligjore për të gjithë nëpunësit e Aluiznit apo Kadastrës të cilët kanë firmosur legalizime në hapësirën publike, të cilat nga Rama janë konsideruar kriminale.