Ndërsa Shqipëria po përjeton një rritje të fortë të fluksit turistik, sektori i bujqësisë nuk po arrin të përfitojë nga ky zhvillim. Të dhënat më të fundit për tregtinë e jashtme tregojnë se kërkesa në rritje për ushqime po mbulohet gjithnjë e më shumë nga importet, madje edhe për produkte ku vendi ka pasur tradicionalisht avantazh konkurrues. Rritja e importeve lidhet me zgjerimin e konsumit të brendshëm, i nxitur kryesisht nga ardhja e hershme e turistëve dhe ndryshimet në treg. Megjithatë, shqetësues mbetet fakti se edhe gjatë periudhës kur prodhimi bujqësor vendas është në kulm, importet e frutave dhe zarzavateve vazhdojnë të rriten. Importet e zarzavateve arritën në 38 mijë tonë gjatë pesëmujorit të parë të vitit, nga 33 mijë tonë një vit më parë, me një rritje prej 15.3%. Ndërkohë, importet e frutave u rritën me 8.1%, duke kaluar 51 mijë tonë.