Ukraina do të vazhdojë importin e energjisë elektrike në sasi rekord, për të plotësuar mungesën e energjisë si pasojë e sulmeve të vazhdueshme të Rusisë mbi infrastrukturën energjetike ukrainase. Operatori i rrjetit energjetik të Ukrainës, Ukrenerho, tha të premten se do të importojë afro 32 mijë megavat energji në orë, duke thyer rekordin e mëparshëm prej afro 30 mijë megavatësh në orë, në fillim të kësaj jave. Ky njoftim vjen një ditë pasi Qeveria ukrainase tha se vendet anëtare të G7 ranë dakord të mbështesin sektorin e energjisë të Ukrainës me 1 miliardë dollarë. Rusia ka shtuar sulmet me raketa dhe dronë kundër infrastrukturës energjetike të Ukrainës prej marsit, duke shkaktuar reduktime të shpeshta të energjisë. Kievi është detyruar të importojë energji nga Bashkimi Evropian për t’i mbajtur dritat ndezur. Ukraina dhe Rusia shkëmbyen sulme me dronë gjatë natës dhe mëngjesit të së premtes, një ditë pasi G7 tha se do ti japë Kievit një hua prej 50 miliardë dollarësh duke përdorur asetet e ngrira ruse.