Presidenti Ilir Meta dhe politikani Arben Malaj ndajnë sot të njëjtat qëndrime politike e mbi të gjitha kundër kryeministrit Rama, edhe pse që të dy vijnë nga radhët e Partisë Socialiste, aty ku kanë nisur karrierat politike. Por, zhvillimet politike të dekadave të fundit kanë bërë që Meta dhe Malaj të ndahen politikisht dhe kreu aktual i shtetit të krijojë një parti të re, ndërsa Malaj vijoi rrugëtimin në PS deri një vit më parë, kur mazhoranca mori vendimin e shkarkimit të tij si anëtar i këshillit mbikqyrës të Bankës së Shqipërisë. Koha ka treguar se politikanët ndryshojnë qëndrimet e tyre. Kështu ka ndodhur edhe me Ilir Metën, që në mbledhjen e Komitetit të përgjithshëm Drejtues, mbledhja e famshme e vitit 2001 akuzoi Arben Malaj për korrupsion. Debati mes tyre vijoi me akuza të ndërsjellta, që duket se tashmë nuk qëndrojnë më, nisur nga sjellja e tanishme e Metës.