Presidenti i SHBA Donald Trump paralajmëroi qeveritë e huaja se do të duhet të paguajnë "shumë para" për të tërhequr tarifat gjithëpërfshirëse, duke i karakterizuar detyrimet si një "ilaç" dhe duke sjellë më shumë dhimbje për tregjet financiare globale të hënën. Tregjet financiare u fundosën në të gjithë botën dhe çmimet e naftës ranë pasi investitorët kishin frikë se detyrimet e paralajmëruara javën e kaluar mund të çonin në çmime më të larta, kërkesë më të dobët dhe potencialisht një recesion global. Pasi bursat në territorin e Kinës dhe Hong Kongut ranë në pikiatë të hënën, media shtetërore raportoi se fondi sovran i Kinës po ndërhynte në përpjekje për të stabilizuar tregun. Ndërkohë, aksionet në Tajvan ranë me pothuajse 10%, rënia më e madhe kjo e regjistruar ndonjëherë dhe kontratat e së ardhmes treguan një ditë tjetër makthi për tregjet në Evropë dhe SHBA. Duke folur me gazetarët në bordin e Air Force One të dielën, Trump tregoi se nuk ishte i shqetësuar për humbjet që kanë fshirë triliona dollarë nga tregjet botërore të aksioneve. "Unë nuk dua që asgjë të bjerë. Por ndonjëherë ju duhet të merrni një ilaç për të rregulluar diçka", tha ai ndërsa kthehej nga një fundjavë golfi në Florida. Trump tha se kishte folur me liderët nga Evropa dhe Azia gjatë fundjavës, të cilët shpresojnë ta bindin atë të ulë tarifat deri në 50% që do të hyjnë në fuqi këtë javë. "Ata po ulen në tryezë. Ata duan të flasin, por nuk ka biseda nëse nuk na paguajnë shumë para në baza vjetore," tha Trumpi. Breshëria e tarifave të Trumpit, e shpallur javën e kaluar u prit me dënime nga liderët botërorë dhe nxiti taksa hakmarrëse nga Kina, ekonomia nr.2 në botë.