“Kemi marrë njerëz që ishin të vdekur. Kishim një person që kishte marrë ritin e fundit fetar, familja po qante dhe gjithçka, dhe nisën t’i jepnin këtë ilaç. Dhe personi u përmirësua. Funksionon”, kjo deklaratë e bërë nga presidenti amerikan Donald Trump gjatë një daljeje për mediat në Zyrën Ovale është përhapur me shpejtësi në internet dhe ka shkaktuar debat dhe konfuzion në rrjetet sociale nëse ka një ilaç që ngjall të vdekurit. Por në fakt, sipas raportimeve, kjo deklaratë është keqkuptuar pasi në të vërtetë Trump po i referohej ligjit “Right to Try Act”, i miratuar gjatë mandatit të tij të parë, i cili u jep pacientëve me sëmundje të pashërueshme mundësinë të provojnë trajtime eksperimentale që ende nuk janë miratuar plotësisht. Presidenti amerikan duket se ka përdorur një gjuhë të ekzagjeruar për të përshkruar raste të pacientëve shumë të sëmurë që kanë shfaqur përmirësime pas trajtimeve eksperimentale, një fenomen që mund të ndodhë në raste të rralla mjekësore. Ndërkohë ekspertët theksojnë se nuk ekziston asnjë “ilaç që ngjall të vdekurit”, ndërsa interpretimi i deklaratës ka çuar në keqkuptime dhe shpërndarje të informacionit të pasaktë në rrjet.