Krocera më e madhe në botë është nisur në lundrim nga Miami, në Florida, në udhëtimin e saj inaugurues, por ka shqetësime për emetimet e metanit të saj. Ikona e deteve, 365 metra e gjatë, ka 20 kuverta dhe mund të mbajë maksimumi 7600 pasagjerë. Ajo është në pronësinë e grupit Royal Caribbean. Anija do të kryejë një udhëtim shtatë ditor në Karaibe. Ambjentalistët paralajmërojnë se gazi i lëngshëm natyral që vë në lëvizje anijen, do të lëshojë metanin e dëmshëm në ajër. E ndërtuar në një kantier në Turku të Finlandës, anija e regjistruar në Bahamas ka shtatë pishina dhe gjashtë rrëshkitëse të mëdha. Për ndërtimin e saj janë shpenzuar 2 miliardë dollarë dhe ajo mban më shumë se 40 restorante, bare dhe lokale. Edhe pse gazi i lëngët natyror, digjet më pastër se sa karburantet e tjera, ekziston rreziku që një pjesë e tij të rrjedhë duke bërë që metani të clirohet në atmosferë. Metani është një gaz i fuqishëm që shkakton efektin serë, madje më i dëmshëm se sa dioksidi i karbonit. Royal Caribbean thotë ndërkohë se Icon of the Seas, është 24 për qind më efikase për sa i takon energjisë në krahasim me rregulloret e organizatës ndërkombëtare të lundrimit për anijet moderne. Kompania planifikon që të nxjerrë në det një anije me zero emetime deri në 2035-ën. Industria e krocerave është një nga sektorët e turizmit që po rritet më shpejt, me të rinjtë në vecanti që janë të interesuar për pushime në anije...Ekspertët thonë se industria e krocerave i ka dhënë ekonomisë globale 75 miliardë dollarë në 2021.