Firmosja e peticioneve, që do të hapin rrugë për shkarkimin e kryetarëve shqiptarë në katër komuna në veri të Kosovës, tashmë ka përfunduar. Darko Vuksanoviq, nga grupi për Zveçanin, ka konfirmuar për Radion Evropa e Lirë se vetëm gjatë ditës së parë, të premten, është mbledhur numri i mjaftueshëm i firmave. Në komunën e Zubin Potokut, ku mbledhja e firmave u bë nga 19 janari deri më sot, ka përfunduar procesi-konfirmon një nga nismëtarët Sërgjan Vucinic. Edhe Sanja Kërtiniq, nga grupi iniciator në Mitrovicën e Veriut, ka thënë se procesi i mbledhjes së firmave ka përfunduar. Në leposavic ndërkohë, firmat e nevojshme u mblodhën që të shtunën. Nismëtarët e peticioneve nuk kanë specifikuar se sa qytetarë kanë firmosur por vetëm kanë thënë se janë mbledhur më shumë firma nga minimumi i kërkuar. Në komunën e Mitrovicës së Veriut, peticionin duhet ta firmosnin të paktën 3.640 votues me të drejtë vote, në Leposaviq 2.689 votues, në Zveçan 1.411 votues dhe në Zubin Potok 1.347 votues, shifra që përbëjnë 20 për qind të numrit të përgjithshëm të votuesve në këto komuna. Hapi i radhës tani është dorëzimi i peticioneve tek kryetarët e kuvendeve komunale. Pas këtij hapi, kryetari i kuvendit komunal ka tre ditë kohë që t’ia përcjellë atë komisionit qendror të zgjedhjeve për shqyrtim dhe verifikim. Nëse KQZ konfirmon vlefshmërinë e peticioneve, organizohet një votim për shkarkimin e kryetarit, brenda 45 ditëve. Që votimi të jetë i suksesshëm kërkohet 50 për qind plus një votë e qytetarëve me të drejtë vote. Rezultati i përcillet më pas presidentes së kosovës, e cila në një afat prej 30 deri 45 ditë, duhet të shpallë zgjedhjet e parakohshme.