Një tjetër rezolutë për Shqipërinë u miratua gjatë forumit të Bashkimit Ndërkombëtar Demokrat (IDU) ku ngrihen shqetësime mbi zhvillimet demokratike, procest zgjedhore dhe funksionimin e shtetit të së drejtës në vend dhe ecurinë e procesit të integrimit europian. Kjo është rezoluta e 8 që miratohet nga partitë e djathta. Dokumenti merr në konsideratë Raportin e V-Dem Institute që e kalsifikon Shqipërinë si autokraci elektroale, ndërsa thekson se korrupsioni është përkeqësuar. Sipas rezolutës, korrupsioni sistemik dhe mungesa e llogaridhënies në nivelet e larta të qeverisjes përbëjnë pengesë serioze për avancimin drejt Bashkimit Europian. IDU në dokumentin e miratuar vlerëson se procesi i integrimit është ngadalësuar ndjeshëm, për shkak të ndërhyrjeve politike në institucionet e drejtësisë dhe lidhje të dyshuara mes zyrtarëve të lartë dhe krimit të organizuar. “Hetimet që implikojnë ministra dhe zyrtarë të lartë në të gjitha nivelet, konfirmojnë korrupsionin sistemik që po ngadalëson integrimin në BE;”, thuhet në rezolutë ndërsa më tej shkruhet se IDU mbështet integrimin e Shqipërisë në BE mbi bazën e meritës dhe pa anashkaluar asnjë kriter. Në aspektin e sigurisë, rezoluta paralajmëron për rritjen e ekspozimit të vendit ndaj ndikimeve të jashtme, veçanërisht nga aktorë si Rusia dhe Kina, si dhe për rreziqet që lidhen me ndërhyrjet hibride, kërcënimet kibernetike dhe cenimin e sistemeve shtetërore. Sa i përket zgjedhjeve, dokumenti konstaton se proceset elektorale nuk kanë përmbushur standardet ndërkombëtare, duke evidentuar keqpërdorimin e burimeve shtetërore, presionin ndaj votuesve dhe përfshirjen e elementëve kriminalë. Në këtë kuadër, bëhet thirrje për një reformë zgjedhore gjithëpërfshirëse dhe për zbatimin e plotë të rekomandimeve të OSBE/ODIHR.